Барысы турында да кыскача

Безнең мәктәптә "Шатлык" театры эшли. Мин анда 1 нче сыйныфтан ук шөгыльләнәм. Мин уйнаган рольләрнең санын да хәтерләмим инде. Берничә ел эчендә мин бик остардым, матур итеп, интонация белән сөйләргә, сәхнәдә үз-үземне тотарга өйрәндем. Быел без "Куян кызы" әкиятен сәхнәләштердек. Әлеге әкиятне видеога төшереп, конкурска да җибәрдек. Әгәр җиңсәк, без район сәхнәсендә дә чыгыш ясаячакбыз әле!

2023 нче ел республикабызда "Милли мәдәният һәм гореф-гадәтләр елы дип игълан ителгән иде. Әлеге үзенчәлекле ел ахырына да якынлаша. Шул уңайдан авылыбыз китапханәсендә әлеге елны йомгаклаган чара булып узды. Китапханәче безне ел дәвамында башкарган эшләре белән таныштырды, әлеге чараларда актив катнашкан укучыларны билгеләп узды.

һәр елның 4 нче ноябрендә Халыклар бердәмлеге көне билгеләп үтелә. Авылыбызның мәдәният йортында әлеге көнне "Без бергә!" дип аталган чара булды. Әлеге чарада мин дә катнаштым. Илебез, халкыбыз, туган ягым турында шигырь сөйләдем. Минем сыйныфташларым да әлеге чарада актив катнашты. Без бергә, без тату!

Районыбызның "Мизгел" яшьләр үзәгенә быел капиталь ремонт ясалды. Ремонттан соң бик матурларланган үзәккә экскурсиягә бардык. Бигрәк матур булган, яңа мебель, яңа интерактив җиһазларга баеган. Анда кино карарга, компьютер уеннары уйнарга,хәтта ашарга пешерергә мөмкин. Үзәк белән танышканнан соң, без уңайлы пуфикларга утырып, бик матур кино карадык. Миңа бик тә ошады. әлеге яңартылган үзәк.

Мин китап укырга бик яратам. Китап у- белем чишмәсе, китап ул- өр-яңа тормыш. Китап укыган кеше һәрвакыт акыллы, белемле була. Шуңа күрә дә, мин "Китапка икенче тормыш бүләк ит!" акциясенә бик теләп кушылдым. Үзебез сатып алган, укыган китапларымны мәктәбемә бүләк иттем. Дустым Илсаф белән без әлеге акциядә җиңүче булдык. Дусларым минем алып килгән китапларымны укысыннар әле.

Капиталь ремонт ясалган "Мизгел" яшьләр үзәгендә "Мизгел" радиосы эшли. Әлеге радионың алып баручылары - укучылар, үзәкнең волонтерлары. Укучы гына булсалар да, алар бик оста, матур , сәнгатьле итеп сөйлиләр, туры эфирга килгән кунаклар белән матур итеп әңгәмә коралар. Мин дә сөйләп карадым әле, туры эфирда булмаса да. Киләчәктә мин әлеге радионың дикторы булырга хыялланам.

Безнең культуралы, әдәпле, тәүфикълы булуыбыз бик мөһим. Әлеге юнәлештә мәктәп, театр, концерт заллары белән бергә мәчетләребездә дә зур эш башкарыла. Фәрит хәзрәт белән очрашу да шул максаттан оештырылган иде. Ул безгә иман ныклыгы, әти-әниләрне хөрмәт итү турында бик яхшы аңлатты. Миңа да, иптәшләремә дә бик ошады әлеге әңгәмә.

Безнең мәктәптә укучыларны мәдәни яктан үстерү буенча күп эшләнә. "Шатлык" театр студиясе эшли, "Фантазия" мультстудиясендә мультфильмнар тәшерәбез, "Наз" вокаль ансамблебез дә бар. Әлеге "Наз" вокаль ансамбле авылыбызның мәдәният йортында концерт куйды. Авылыбыз өлкәннәре концертыбызны бик яраттылар. Көчле алкышлар, мактау сүзләре безне тагын да дәртләндереп җибәрде. Яңа җырлар өйрәнербез әле тагын.

Авылыбызның мәдәният йортында "Наяннар" балалар театры эшләп килә. Анда мәктәбебездә укучы балалар да йөри. Мин дә бик яратып йөрим әлеге театрга. Репетицияләр вакытында без төрле рольләргә ничек керергә, сәхнәдә үз-үзебезне ничек тотарга икәнен өйрәнәбез. Әле яңа гына куйган спектаклебез "Тәгәри китте йомгагым" дип атала. Ул А.Алиш әкиятләренә нигезләнеп язылган. Без аны авыл халкына тәкъдим иттек. Видеоязмага төшереп, конкурска да җибәрдек әле. Киләчәктә без аны мәктәбебебздә һәм балалар бакчасында да күрсәтәчәкбез әле.

Сикия авылы клубында авыл музее да урнашкан. Әлеге музей искиткеч бай, нинди генә экспонатлар юк анда!



Музейның бу өлешендә борынгы көнкүреш кирәк- яраклары урнаштырылган. Кер юуу тактасы, он иләгеч, икмәк сугу җайланмасы, камыр җәю җайланмасы һәм башкалар. Бу җайланмалар хәзер дә кулланыла, ләкин алар хәзер тагын да уңайлырак итеп эшләнгәннәр.