Россия һәм республика күләмендә танылган атказанган иҗатчыларыбыз.

Әһлетдинов Мәгыйс Әһлетдин улы 1946 елның 9 августында Актаныш районы Тыңламас авылында туа. Актаныш урта мәктәбен тәмамлаганнан соң, Алабуга культура –агарту училищесында укый. Совет Армиясе сафларында хезмәт итеп кайтып, 1970 елда Тыңламас авылы клубы мөдире булып эшли башлый. 1976 елдан 1987 елга кадәр Кәзкәй мәдәният йорты директоры вазифасын алып бара. 1980 елда дәүләт мәдәният институтын тәмамлый. 1987 елдан Актаныш район мәдәният йортында методист булып эшли башлый, аннары сәнгать җитәкчесе була. 2013 елдан Актаныш районы Туган як музеенда хезмәт итә.
Нәфис сүз сәнгате белән ныклап шөгыльләнә. 1963 елдан бирле район күләмендәге концертларны алып бара. Районда 1999 елдан бирле Мәгыйс Әһлетдинов исемендәге нәфис сүз башкаручылар конкурсы үткәрелеп килде.
Республика яшьләр фестивале лауреаты, Массовикларның Бөтенсоюз конкурсы дипломанты, Бөтенсоюз халык сәнгате фестивале лауреаты, Татарстанның атказанган мәдәният хезмәткәре. Мәгыйс Әһлетдин улы Татарстан Республикасы Президентының Мактау грамотасы, Татарстан Республикасының “Фидакарь хезмәт өчен” медале белән бүләкләнә. 2020 елда исә мәртәбәле райондашыбызга ТАССРның 100 еллыгы медале тапшырылды.