Минем яраткан китабым

Минем яраткан китабым

     Мин, Закиров Амин, Норма урта мәктәбенең 2 нче сыйныфында белем алам.

      Миңа 8 яшь. Минем яратып башкара торган шөгыльләрем күп. Буш вакытымда рәсем ясарга, кәгазьдән кисеп ябыштырып, төрле композицияләр иҗат итәргә, әлбәттә китаплар укырга яратам.

      Китапларны мин авыл, мәктәп китапханәсеннән алып укыйм. Өстенлекне күбрәк шигырь, әкият китапларына бирәм.

       Китапларым күп. Аларны миңа әнием һәм әбием    сатып та алалар. Аларның кайсыберләре инде таушалырга да өлгерде,  чөнки мин аларны кат-кат укыйм, шигырьләрен ятлыйм, рәсемнәрен төшерәм.

       Ләкин  сезгә сөйлисе иң яраткан китабымны мин күз карасыдай кадерләп саклыйм. Ул “Бал корты һәм шөпшә” дип атала.   Бу китап Казан шәһәре Татарстан китап нәшриятендә “Исәнме, мәктәп!” сериясендә  2008 нче елда басылган. Автор-төзүчесе һәм мөхәррире: Талия Шакирова.  Матур рәсемнәр белән бизәүчеләре:  Алла Айсена, Валерий Фомин. Тиражы: 5000 данә

     Бу минем иң яраткан китабым гына түгел, ә иң кадерле, истәлекле тәүге китабым.

     Аны миңа класс җитәкчебез Ибнеева Фәридә Фәрит  кызы Әлифба бәйрәмендә  бүләк итте. Бал кортлары бик тырыш, бердәм, хезмәт сөючән, ярдәмчел бөҗәкләр.Алар тәртипне, чисталыкны, пөхтәлекне яраталар.
      Кешеләрне, төрле авыруларга дәва булырдай, татлы бал белән сыйлыйлар.
      Китапны төзүче апа да балаларның кечкенәдән үк бал кортлары кебек тырыш, җәмгыятькә файдалы чын кешеләр булып үсүләрен, шөпшә кебек ялкау булмауларын теләп китапны шулай атагандыр. Бу китап  кече яшьтәге балалар өчен. Ләкин ул бүген дә минем өстәл китабым. Хәзер андагы әкиятләрне, хикәяләрне энеләремә, сеңлемә укыйм, бергәләп рәсемнәрен карыйбыз, табышмакларын чишәбез.

 Сез дә бу китап белән кечкенә дусларыгызны сөендерә аласыз.

         Китап  - кешенең дусты, китапның белмәгәне юк. Татар халкында китап турында мәкаль һәм әйтемнәр бик күп. Китапларны күп укысаң, аларны яратсаң, бик күпне белергә, һәрчак  уңышка ирешергә мөмкин.       

        Дусларым, китапны яратыгыз, аның белән дус булыгыз!