Минем кышкы сәяхәтләрем

Нәкъ Казан артында бардыр бер авыл – “Кырлай”, диләр;

Җырлаганда, көй өчен “тавыклары җырлай” диләр.

Менә шул Кырлайдагы “Кыш бабай резиденция”сенә бардык без кышкы каникул вакытында. Җәй көне яраткан Тукаебызның музеен, Сәгъди абзый бакчасын карап, суда көймәдә йөреп кайткан идек. 3 нче гыйнвар көнне без тагын Кырлайга юл тоттык. Безне Кырлай мәктәбе янында Убырлы карчык, ике Шайтан, Шүрәле һәм Былтыр, ике Батыр каршы алды. Алар безне матур итеп сәламләделәр, командаларга бүлделәр. Без “Яшелләр” командасы булдык. Биедек, төрле уеннар уйнадык. Безне алар урмандагы “Әкият дөньясы” на алып керделәр. Анда безне Таһир белән Зөһрә көтеп торалар иде. Урман буйлап бардык һәм Кыш бабай өенә, ягъни Тукай музеена килдек. Мин татар Кыш бабаен һәм татар Кар кызын күрдем. Кыш бабай үзенең резиденциясенә алып керде. Аның өе төрле мишуралар, уенчыклар белән бик матур итеп бизәлгән иде. Бер почмакта, бәйрәмне ямьләндереп, чыршы тора. Кыш бабай миңа кулын да бирде әле. Кыш бабай команданы тылсымлы “Әкият бүлмәсе”нә алып керде. Курчак Кыш бабай һәм курчак Кар кызы кыш турында тамаша күрсәттеләр, ак чыршыны яшелгә әйләндерделәр. Кызыклы экскурсиядән соң без туганнарыбызда кунакта булдык, аннан соң өйгә кайттык.

         Икенче көнне без Казанга киттек. “Әкият” курчак театры янындагы “Боз шәһәрчеге” ндә булдык. Мин карусельдә атындым, понида йөрдем, “Боз шәһәрчеге”, чыннан да, искиткеч матур, сихри, әкияти иде. Боз коймалар, боздан ясалган Кыш бабай һәм Кар кызы, боз капкалар, боз манаралар, боз шугалак – һәммәсе кечкенәләрне генә түгел, зурларны да сокландырды. Боздан ясалган әкият эчендә Тукай әкиятенең геройлары да бар иде. Безнең өчен шундый тамашалар, бәйрәмнәр, уен мәйданчыклары оештырган зурларга рәхмәт.