Обо всем кратко

Үткәннәрдә йөрдек... Тарих буйлап
Кылдык бик зур сәяхәт.
Борынгы бабамнар җирендә
Җаннарга алдык сихәт.

Изге Болгар! Бу җирләрдә
Татарның рухы яши.
Колшәрифләр илен яклап,
Яшеннәр булып яшьни.

Зөя кала- шәһәрчеге
Ерактан тора балкып.
Санаулы көннәр эчендә
Зур кала чыккан калкып.

И, Казан! Нурлы да син,
Моңлы Тукай әйткәнчә.
Синең урамнарың буйлап
Кайтып килдек үткәнгә.

Зур сәяхәт әле дәвам итә:
Алда - шанлы Бөгелмә.
Әкрен генә миңа әйтә сыман:
“Мин дә түздем, син дә бирешмә!”

Тормыш дәвам итә... Еллар
Үткән саен калка шәһәрләр.
Чал тарихның бер буыны алар –
Чаллы, Түбән Кама, Әлмәтләр.

Мөслим ягы безнең җырдагыча
Үзе якты, үзе ягымлы.
Хезмәт сөйгән халкым эше белән
Ямьләп яши туган ягымны.*

Үз тарихын белгән бала гына
Хөрмәт итәр илен, гаиләсен.
Улларымның киләчәген Ходам
Бәхетле һәм нурлы әйләсен...



*Лилия Садриева шигыреннән бер куплет