Бөек ватан сугышы ветеранына хат

"Бөек ватан сугышы ветеранына хат" дигән конкурска мин карт бабаема мондый хат яздым.

Исәнме, минем карт бабаем Сөләйман улы Хөсәен!
Бу хатны сиңа оныканың улы Камиль яза. Мин сине беркайчан да күрмәдем. Син инде күптән безнең арада юк. Ләкин мин синең турында әни һәм әби сөйләүләре буенча бераз беләм.
Син Бөек Ватан сугыш башланганда инде җиткән ир булгансың, сиңа утыз сигез яшь булган. Хөсәен бабаем, син Ленинград өлкәсендә җәяүле гаскәрдә хезмәт иткәнсең. Ленинградның блокадасын өзүдә катнашкансың. Шунда башыңны дошман пулясы яралаган, госпитальда озак яткансың. Аннары фронтка кире кайткансың. Ләкин бераз вакыттан соң тагын контузия алгансың. Шул чакта син сугыш тәмамлану турында яхшы хәбәрне ишеткәнсен.
Синең сугышта хезмәт иткәнең өчен медаль һәм беренче дәрәжәле Бөек Ватан сугышы ордены бар. Без аларны, синең белән горурланып, бик саклыйбыз. Карт бабаем, мин синең гөмер буе сугышта яраланган башың авыртканын беләм.
Тиздән тугызынчы май бәйрәме. Фашистларны җинүгә җитмеш ел була. Кәдерле карт бабаем Хөсәен, мин сиңа кыюлыгың, батырлыгың өчен рәхмәт әйтәсем килә.
Сиңа куркыныч булгандыр, ләкин син үз Ватаныңны һәм гаиләңне яраткансың, шуңа күрә дошманнар белән сугышкансың. Син һәм бүтән солдатлар безгә тыныч күк йөзе бүләк иткәнсез. Карт бабаем Хөсәен, мин синең белән горурланам.

Сөләйманов Камиль