Әлмәт Драма театры музее

2008 нче елның 27 мартында Халыкара театр көнендә, Әлмәт татар дәүләт театрында төзекләндерелгән театр музее үзенең эшен башлап җибәргән.
Музей әлеге мәдәни учакның үткәндәге тарихи сәхифәләрен — 1944 елның мартыннан алып бүгенге көнгә кадәр эшчәнлеген чагылдыра. Әлмәт татар дәүләт театрының беренче җитәкчесе — Әсфан Галиев.
Театрга режиссер Гали Хөсәенов зур танылу алып килә. Әлеге шәхес дөнья һәм рус классиклары әсәрләрен куя, яшь авторлар белән эшли, зур талантлар тәрбияли. Аның куелышындагы “Анам кыры” (Ч.Айтматов), “Шәмсекамәр” (М.Әблиев), “Ай булмаса — йолдыз бар” (Т.Миңнуллин), “Без унике кыз идек” (А.Гыйләҗев) спектакльләре татар дөньясында зур яңалык буларак кабул ителә.
Әлеге музейда бу шәхесләргә зур урын бирелгән. Куелган спектакльләрнең афишалары, фотолар, программкалар шул хакта сөйли. Кадерле экспонатлар арасында Р.Ишморатның “Кайту” спектакле афишасы, беренче артистлар киеп уйнаган калфак һәм түбәтәй, Татарстанның атказанган артисты Б.Гатауллинның үзе ясаган чемоданы, шулай ук күп санлы фотоларның негативлары һәм пленкалары бар.
Театр тормышында якты эз калдырган башкаларның иҗат мизгелләрен чагылдыручы фотосурәтләр, диплом, газета мәкаләләре, альбомнар музейда киң урын алган. “Күренекле артистлар”, “Баш режиссерлар”, “Директорлар”, “Фестивальләр”, “Театр йөргән юллар” дигән бүлекләрдә дә театр тарихы белән танышырга мөмкин.