Лилия Садриева "Өр-яңа яз килә Мөслимгә"

Туган якны төреп, кинәндереп
Илаһи бер назлы төсмергә.
Яшәү дәрте өстәп кешеләргә
Өр-яңа яз килә Мөслимгә.
Сабырсызлык белән көтә күңел
Язлар алып килер назларны.
Зәңгәр Ыгым көтә, сагынудан
Сагыш төяп кайткан казларны.
Гөрләвекләр көйли язгы көйне,
Кояшның да карый яктысы.
Күңел тилерә күк яз назыннан
Ә күңелдә яшәү чаткысы.
Кушылыплар бер җырлыйсы килә
Яз тудырган серле шул көйгә.
Киләчәккә якты өмет бөркеп
Өр-яңа яз килә Мөслимгә.