ГлавнаяСТАТЬИКонкурс. Лучшее культурное впечатлениеГабдулла Тукайның әдәби музее

Габдулла Тукайның әдәби музее

20 января 2016 - Разиля Ханова

   Мин декабрьдә апаем Ислам,әнием белән , Казанда, Габдулла Тукайның әдәби музеенда булдым.Музей шагыйрьнең тууына 100 ел тулган көнне 1986 нчы елда Казанның иң матур биналарында ачылды.

Габдулла Тукайның балачагы, иҗат чоры белән таныштым.Г.Тукайның 1912 нче елда сатып алынган карандаш савыты, түбәтәе, көмеш каптырмалары, туганнарына язган хатлары, фаянс тартмачык(Тукай беренче китабы гонорарына сатып алып апасы Газизәгә бүләк итә), дуслары белән төшкән фотоларын, Тукайның бюстларын, борынгы заманда чигелгән сөлгеләр, суккан паласлар,җиз самоварьлар, ул чагында чыгарылган газета, журналларны һәм башка бик күп төрле әйберләрне күрдем.

Фаянс тартмачык

 

Г.Тукайның түбәтәе

Татар халкының бөек шагыйре Габдулла Тукай дөньяда нибары 27 ел яшәп, сигез ел иҗат итеп гасырларга җитәрлек рухи байлык калдырган шәхес.Халыкка хезмәт итәрлек иҗат тудыру өчен  табигать тарафыннан бирелгән шагыйрьлек сәләтенә ия булырга кирәк.Габдуллага бу сыйфат юмарт бирелгән була.

Менә 130 елга якын вакыт үтсә дә, без сөекле шагыйребезнең әсәрләрен,әкиятләрен яратып укыйбыз.Тукайның китаплары  безне матурлыкка, яхшылыкка өйрәтә, шәфкатьле, гадел, кыю булырга өнди.

Г.Тукайның әкиятләре бик күп телләргә тәрҗемә ителеп басылып чыкты.

Музейда да “Шүрәле”әкиятенең геройларын бик матур итеп ясап куйганнар.

Тукай театр сәхнәсендә дә яши, тарихи романнарда да яши.Татарстанда иҗат ителгән иң яхшы әдәбият, сәнгать әсәрләре өчен Тукай туган көндә әдәбият, сәнгать әһелләренә ел саен Габдулла Тукай исемендәге Дәүләт премиясе бирелә.Казанның иң борынгы урамнарының берсенә Тукай исеме бирелгән.

"Шурале"балетыннан костюмнар.XXгасырның икенче яртысы

Һәр елның 26 нчы апрелендә Татарстан язучылары җыелышып Казан шәһәрендәге бөек шәхесләрнең һәйкәлләренә чәчәк куялар.

Г.Камал театры янындагы бронзадан ясалган Былтыр һәм Шүрәле 

Шигырь бәйрәме М.Җәлил исемендәге Татар  дәүләт опера һәм балет театры янындагы Тукай һәйкәле янында дәвам итә.Монда халык Габдулла Тукай премиясенә лаек булган яңа лауреатлар белән таныша.Тукай хаман да халык белән бергә атлый.

Миңа Тукай музеенда бик ошады.Мин яңадан үземне урманда Шүрәлеләр, су буенда Су анасы  араларында йөргән кебек хис иттем.

Г.Тукай безгә туган илебезне,әби-бабай,әти-әниебезне яратырга, туган телебезне онытмаска кирәклеген үзенең шигырьләрендә бик матур итеп язган.Шуңа күрә мин Тукай абыйның язган шигырьләренә тугыры калып ,үзебезнең туган илебезне, туган телебезне,әти-әни,әби-бабайларыбызны яратып, хөрмәт итеп үсәргә тырышам.

Безнең Татарстан Республикасы Президенты химаясендә Татарстан Республикасы Мәдәният министрлыгы, Татарстан Республикасы Мәгариф һәм фән министрлыгы тарафыннан чыгарылган “Укучының мәдәни көндәлеге”проекты моның ачык мисалы булып тора.

Без халкыбызның үткән тормышларын, гореф-гадәтләрен, бөек, талантлы, данлы, герой шәхесләрен онытырга тиеш түгел!

Мин Габдулла Тукайның әдәби музееннан шундый хисләр, кичерешләр һәм тәэсирләр белән чыктым.Минем язмамны Габдулла Тукайга багышлап үзем язган шигырь юллары белән тәмамлыйсым килә.

                                      Тукай абыйга.

Тукай абый безгә шигырь язган,

Белегез дип туган телегезне!

Яратыгыз газиз әнкәгезне,

Әби-бабайларны, илегезне!

Су буена төшсәм Су анасы

Утыра кебек чәчен тарап басмада,

Урманнарга керсәм Шүрәлеләр

Чыгар төсле йөгереп каршыма.

Болыннарда оча күбәләкләр,

Аллы-гөлле чәчәкләргә кунып,

Өй тирәсен саклый Акбай

Карак угырылар кермәсен дип.

Тукай абый без үскәч тә ,

Җырларыңа тугыры калырбыз

Туган илебезне, туган телебезне

Чит ятлардан саклап торырбыз!

Рейтинг: +71 1319 просмотров
Комментарии (70)

tatbook.ru