ГлавнаяСвободная темаАларның даны мәңгелек.

Аларның даны мәңгелек.

15 декабря 2015 - Эльвина Хакимова

Аларның даны мәңгелек.

Кешелек дөньясы ХХI гасырда яши. ХХ гасыр әкрен генә тарих түренә үтеп бара һәм үзе белән гасырның иң олы фаҗигасен, коточкыч афәтен – Бөек Ватан сугышын да алып китә. Сугыш беткәнгә 70 ел гомер үтсә дә, аның яралары бүген дә сыкрый әле. Ул үзенең тирән эзен салып калдырмаган берәр гаилә бармы икән? Җиңү көне бездән ерагая барган саен аның кадере арта. Ә бу афәтне үз күзләре белән күргән, Бөек Җиңүгә зур өлешләрен керткән батырларыбыз елдан-ел кими бара.

Шуларның берсе – карт бабам Сәлахов Сәлих Сәлах улы, 1923 елның 30 ноябрендә Иске Кормаш авылында дөньяга килгән. Ачлык-ялангачлык алар гаиләсен дэ аямый. Тик, авыр тормышта яшәсәләр дә, нык, эшчән булып үсәләр. Җидееллык мәктәпне тәмамлаганнан соң ул колхозда төрле эштә тырыш хезмәт куя. Ә 1942 елның 2 маенда, 19 яше дә тулмаган килеш, сугышка китә. Анда Сталинград, Курск, Волхов һәм башка хәлиткеч сугышларда катнаша. Ике тапкыр авыр яралана. Батырлыклары өчен бик күп орден-медальләр белән бүләкләнә. Сугыш беткәч, Чехославакиядә хезмәтен тутырып, 1947 елның февралендә туган авылына әйләнеп кайта. Колхозда эшли башлый, гаилә кора.

Күп кайгы, авырлыклар күргән кеше каты күңелле, мәрхәмәтсез була, диләр. Мин моның белән бер дә килешмим. Чөнки, әнием сөйләве буенча, карт бабам бик нечкә һәм яхшы күңелле кеше булган. Авылда аны бар кеше хөрмәт иткән. Кадерле карт бабам 1995 елның август аенда вафат булган. Мәрхүм бабам бүгенге көндә исән булса, оныкларымның балалары, оныкчыкларым дип, безне сөяр иде. Нишлисең, бу дөньяга берәүдә мәңгелеккә килмәгән. Шуңа да карамастан мин шундый батыр карт бабакаем булганлыгы белән горурланам. Без, аның оныклары, оныкчыклары, ул сызган туры сукмактан атлыйбыз, аның турындагы хатирәләрне күңелләребездә саклыйбыз.

Бүгенге матур көннәр хакына кан койган чал чәчле әби-бабайларыбызның моңсу күзләренә карагач: “Кирәкми безгә сугыш”, — дип кычкырасы, ә яшьтәшләремә: “Үлгәннәрнең каберен, исәннәрнең кадерен белик!” – диясе килә.

Илне саклап данлы юл үттегез,

Утлар- суларны Сез кичтегез.

Кирәгенчә хөрмәт итә алмасак,

Зинһар, безне гафу итегез.

 

Рейтинг: +1 95 просмотров
Комментарии (2)

tatbook.ru