Лилия Садриева "Мөслимем - гүзәл илем"

Иркә таулар итәгендә
Мөслимем – гүзәл илем.
Туган туфрагымда сулмас
Бер гөлең булыр идем.
Үткәнем һәм киләчәгем,
Бәхетем синдә, Мөслим.
Туган якны данлап сайрар
Бер моңлы кошың бит мин.
Күңелемне назлап туймый
Синең изге исемең.
Гүзәллегең аңлатырдай
Сүзләр эзлим, Мөслимем.
Ык суларың җанга шифа
Шифалы чишмәләрең.
Җаным яралган илемне
Мин ташлап китәлмәмен.
Якты, назлы моңга төреп.
Яңгыратыйк исемен.
Игелекле әнкәм минем,
И, сөекле Мөслимем.